Jugendstilsenteret og KUBE er eit kunstmuseum som ligg i hjartet av Ålesund sentrum. Museet har eit nasjonalt ansvar for jugendstilen og er kunstmuseet i Møre og Romsdal fylke. Her finn du mellom anna originalt jugendstilinteriør og skiftande samtidskunstutstillingar, og ei rekkje aktivitetar for publikum.

Jugendstilsenteret og KUBE er eit museum for kunst, arkitektur og design frå slutten av 1800-talet og fram til vår eiga samtid. Kunstmuseet utviklar og forvaltar ei samling med særleg fokus på norsk- og nordisk jugendstil og kunst som har tilknyting til regionen. Kunstmuseet skal være ei bærekraftig plattform for demokratiske verdiar og mangfald gjennom å fremje frie kunstnariske ytringar, kunnskapsutveksling og kritisk refleksjon.

Som kunstmuseet i Møre og Romsdal har vi eit særskilt ansvar for å opne oss mot verda og opne for verda mot oss. Dette går hand i hand med vårt mandat som nasjonalt kompetansesenter for jugendstilen. I våre to bygg skaper vi interesse for, og kunnskap om, kunst, arkitektur og design gjennom eit breitt publikumstilbod.

Jugendstilsenteret ligg i Apotekergården, eit jugendstilbygg som sto ferdig i 1907 og som på den tida husa både apotekutsal og bustad. No får du innblikk i jugendstilen her, gjennom autentiske interiør, samt faste utstillingar med jugendstilobjekt og skiftande utstillingar.

KUBE ligg i Noregs Bank-bygget frå 1906, som blei bygd om i 2005 for å huse kunstmuseet. I løpet av eit år byr KUBE på fleire skiftande kunstutstillingar. Her kan du finne alt frå større tematiske presentasjonar til utstillingar med enkeltkunstnarar.

Jugendstilsenteret og KUBE ønskjer å gi publikum brei innsikt i tematikkane vi tek opp i utstillingane våre. Gjennom året byr vi difor på eit aktivt formidlingsprogram med opne omvisingar, foredrag, konsertar og andre arrangement.